蛋白質、碳水化合物、脂肪係增肌時不可或缺嘅3️⃣大宏量營養素，其中蛋白質係構成肌肉嘅主要成分💪🏻，而碳水化合物同脂肪則為身體提供能量🔋。不過有好多人都以為，想快啲增肌就要食多啲蛋白質，反而吸收得唔夠碳水，當身體能量不夠時，其實係會將多餘嘅蛋白質分解轉化為碳水化合物，結果反而導致肌肉流失架！

無論你係想減肥定係增肌，計算每日所需嘅宏量營養素（Macronutrients，簡稱Macros）都能夠幫我哋更加輕鬆咁達成目標。

宏量營養素嚴格嚟講係有四種：

🌟碳水化合物

🌟蛋白質

🌟脂肪

🌟酒精

不過我哋今次會著重介紹頭三種主要宏量營養素。

三大宏量營養素嘅功能

碳水化合物

碳水化合物係人體嘅主要燃料，同時可以保持腸道健康同免疫能力。

蛋白質

蛋白質由氨基酸合成，負責身體嘅肌肉結構、細胞組成，維持正常機能運作，再喺需要時提供能量。

脂肪

脂肪或脂類主要負責喺體內儲存能量，協助細胞組成同運作，調節體溫及保護身體器官。

每克營養提供嘅熱量

碳水化合物：每克 4 卡路里

蛋白質：每克 4 卡路里

脂肪：每克 9 卡路里

宏量營養素攝取比例｜增肌減脂要點食？

一個合理分配嘅宏量營養素比例，可以提升飽腹感、調節血糖水平同加快新陳代謝。一般建議嘅營養比例係40％ 碳水化合物、30％ 蛋白質同 30％ 脂肪，但係最緊要係根據個人身體反應同目標嚟調整。

增肌：碳水化合物>蛋白質>脂肪
減脂：蛋白質>碳水化合物≈脂肪

增肌除咗需要蛋白質，其實都要攝取足夠嘅碳水化合物嚟補充能量消耗。減脂嘅人士就適合高蛋白質嘅飲食，因為身體消化蛋白質時使用嘅能量較多。

可以透過咩食物攝取宏量營養？

你可能已經發現到，有啲食物係含有一種以上嘅宏量營養素，例如穀物（碳水化合物、蛋白質）同肉類（蛋白質、脂肪）。其實所有食物都分別含有唔同比例嘅各種宏量營養素，所以想將食物清晰咁界定為某種宏量營養素嘅來源都唔係咁容易。

如果想了解邊啲食物係主要提供邊種宏量營養素，最佳方法就係睇番食品包裝上嘅營養標籤，或者上網搜尋營養資訊。長期堅持做落去，直到你越嚟越熟悉，就會知道應該揀啲咩嚟食。

• Facebook
• Instagram